Outeniqua streef daarna om die basiese kernwaardes te bevorder. Daarom fokus ons op waardes soos respek, omgee, betroubaarheid en om eties korrekte besluite te neem. Die skool streef daarna om ‘n gemeenskap te skep waar almal gerespekteer word en waar elke onderwyser en leerder beleef dat hy/sy erken en gewaardeer word. Ons glo dat die versterking van bogenoemde waardes tot die skool se uiteindelike doelwit van uitnemendheid sal bydra.
Wat bied Outeniqua?
VCSV
Ons as Kwaggas voel baie geëerd met die 1081 leerders wat aan ons VCSV van 2011 behoort. Onder hulle is daar 107 kringleiers wat elke Maandagaand opleidingsessies bywoon wat deur die jeugpredikant, Rudolf Grobler, aangebied word. Hierdie kringleiers fasiliteer elke Woensdagmiddag ‘n kring, waar hul saam leer en groei in hul verhouding met die Here. Hulle woon ook twee kampe per jaar by, waar hul konsentreer op geestelike verryking en kringleiersopleiding.
Daar is vir alle leerders ‘n kwartaallikse byeenkoms waar hul ‘n fantastiese lofprysing- en aanbiddingsessie kan bywoon en ‘n boodskap van gassprekers ontvang. Ons beplan met Pinkster weer ‘n tent op die terrein waar ons glo dat die Here groot dinge vir ons kinders se lewens beplan. Die skool het ook beraders en ‘n sielkundige wat die kinders kan bystaan deur al hul probleme en swaarkry.
Ons is dankbaar vir die wonderlike geleenthede wat die Kwaggas gebied word om konstant geestelik te groei.
Vir ‘n aantal jare maak die WKOD nie meer voorsiening vir dienste deur sielkundiges by skole nie. Outeniqua het sy eie model ontwikkel en leerders en personeel wat hulp of berading nodig het, kan dit deur die skool kry.
Die skool maak gebruik van ‘n sielkundige en beraders wat weekliks die skool besoek en hul hulp aan leerders en onderwysers aanbied. Baie leerders is al op hierdie manier gehelp om hul emosionele probleme beter te hanteer of om trauma te verwerk.
In samewerking met die OBOS kantoor bied ons ook positiewe gedragsversterkingsprogramme aan vir leerders wat dit nodig het.
Kontakpersoon: Me A. van Schalkwyk
KANSA
Die Kwaggas is ook op verskeie terreine besig om in die gemeenskap diens te lewer. Vanjaar was ons al by twee Kansa projekte betrokke en die kwartaal word nog ‘n projek vir Kansa geloods.
Bloedskenk
Die afgelope drie jaar skenk die Kwaggas bloed en ons word as een van die skole bestempel wat die meeste bloed skenk. Elke kwartaal vloei die bloed dus in Kwaggaland om lewens te red.
Carpe Diem Skool
Die Kwaggas is ook baie betrokke by Carpe Diem Skool. Die leerders gaan speel met die kinders en is ook betrokke in projekte om hul lewens te vergemaklik. Hierdie projek is baie spesiaal, want elke Kwagga besef weereens hoe bevoorreg hy/sy is om gesond te wees en ‘n normale lewe te kan lei.
Sente vir Christus
Die Kwaggas het hande gevat en geld ingesamel vir Alabanza, ‘n sendingorganisasie wat sendelinge wêreldwyd stuur.
George Hospitaal Kindersaal
Die diensleweringskomitee beplan ook om nog hierdie jaar by die kindersaal van die George Hospitaal betrokke te raak.
Geelhoutboom Uitreikaksie
Ons is baie dankbaar teenoor die Here dat 998 leerders van die skool aan die VCSV behoort. Daar is 99 kringleiers wat weekliks geskool word om Woensdae hul kringe aan te bied. Die opleiding van die kringleiers word deur ons dinamiese jeugpredikant, Manie Botha, gedoen. Twee keer ‘n jaar word skolingskampe aangebied waar die leerders die geleentheid tot geestelike verdieping kry en ook sosiaal met mede-Christene verkeer.
Kwartaalliks geniet die Kwaggas die algemene byeenkomste wat lof- en aanbiddingsgeleenthede met sprekers van buite is. Op Woensdae voor skool vergader ‘n groot klomp Kwaggas op die C-veld om saam te bid.
Ons is dankbaar dat daar so ‘n groot belangstelling in die VCSV is en dat daar so baie leerders is wat bereid is om God se naam groot te maak. Ons beplan ook om die komende Pinkstertyd dienste in ‘n tent op die skoolterrein te hou. Dit sal deur Manie Botha gelei word.
