Welkom by Hoërskool Outeniqua

Hoërskool Outeniqua is in George, in die hart van die pragtige Tuinroete geleë. Ons besonderse geografiese ligging, heerlike klimaat, lieflike strande, asook sy wandelpaaie deur die unieke natuurskoon van berge, woude, mere en riviere maak van George ‘n ware paradys. Hoërskool Outeniqua is in 1923 gestig en ons het in 2023 ons honderdjarige bestaan op ‘n luisterryke wyse gevier. Die roemryke skool bied ‘n gebalanseerde opvoeding aan sy 1 730 leerders. Dit is die doelwit om elke leerder as totale mens te ontwikkel en die nodige kennis en praktiese ondervinding te gee om verder te studeer of om die beroepslewe met vertroue te betree. Ons wil ook hê dat leerders die lewe binne ‘n veilige omgewing sal geniet.

Die skool bied ‘n wye vakkeuse, ‘n verskeidenheid kultuur-en sportaktiwiteite en hope geleenthede vir leierskap en mensontwikkeling aan. Hoërskool 0uteniqua is bekend vir sy uitstekende akademiese onderrig, puik akademiese onderrigfasiliteite, goed opgeleide, gemotiveerde en entoesiastiese personeel, tradisieryke geskiedenis, verrykende en karaktervormende kultuurbeoefening, vele sportgeleenthede, skitterende akademiese-, sport- en kultuuruitslae en hope geleenthede vir gesonde pret. Dit is vir ons ‘n prioriteit om om te sien na die emosionele versorging van ons leerders, personeel en ja, soms ook na die emosionele versorging van ouers.